مهما يلمع في الهوا بأوهام ضي وبريق
مهما بالفبركة يلون لنا المستقبل والأماني والطريق
مهما يقول ويحلف إنه لينا صديق
مهما يلبس (بلوفر) البراءة ويعمل إنه بريء
مهما يقول إنه طيب وف حب مصر غريق
إحنا موش ممكن ننتخب أبدًا أحمد شفيق
*****
إحنا زهقنا من الخداع والغش
شفيق هو مبارك بس لابس وش
الفلول واقفة معاه وعنه ماتتنازلش
كل النهب دا من غير شبع لابد يملوا الكرش
بيحلفوا بسنين مبارك والوريث اللي كان ها يقش
عايزين شفيق يبقى ريس وغير الفلول ما يشوفش
ترجع أمجاد الفلول مبارك يسيبه بقى م البرش
ثورة يناير تبقى أسطورة أو يمكن تكون ما قامتش
شهدا الثورة يبقوا المجرمين والعادلى بريء ماقتلش
بلطجية موقعة الجمل يتكرموا بأوسمة من درجة الكبش
فِ التحرير ينكتب اسمهم بالحروف والنقش
الحزب الوطني يرجع تاني باسم حزب البطش
أمن الدولة تعود من تاني وها تقتل ما تعزبش
المعتقلات من تاني تتملي وكل مواطن مربوط ف إيده كلبش
*****
السرقة تبقى علني وعيني عينك واللي ها يتكلم
دوغري على طره لجل ما يفهم ويتعلم
إزاي يبقى مواطن حقيقي مشارك موش مبلم
لما يشوف الحرامي بيسرق يشجعه وعليه يسلم
يالابينا ننقذ مصر والثورة من اللي عايزينها تضلم
-------------
