سواد الصبح أطول من سواد الليل اخطر

سواد الليل بيخلص ويَّا ضي الفجر الأخضر

سواد الصبح ويَّا الليل بيكتر

سواد الليل دا راحة..

وبصراحة..

ممكن يكون إلهام لشاعر

والمشاعر فيه مباحة

سواد الصبح هم كبير وضيق

وأكبر مساحة في عمرنا..

للهم دايمًا مستباحة

سواد الليل بيستسلم لصوت الفجر

بيتوضَّى بأمل بكرة

وبيصلي مع المظاليم..

صلاة العدل والقدرة

وبيغني مع العشَّاق..

مع المشتاق

غناوي الحب والذكرى

سواد الصبح سوط جلاد

وسيف سياف

ورغم الظلم والجبروت

يعيش عمره ذليل خواف

ولو يسقينا كاس مرة

بنشرب من سموم غدره

جميع لصناف

يعذبنا... يموِّتنا

ويستعمر قلوب غيرنا

يسوّد صبحهم عنَّا

وييجي في الزمن غادي

شاعر تاني

شاعر عادي

بيتوجع كما وجعي

يقول قولي

ويصرخ صرختي ينادي:

سواد الصبح أطول من سواد الليل واخطر

سواد الليل بيخلص ويَّا ضي الفجر الاخضر

سواد الصبح ويَّا الليل بيكتر