أنا الصندوق

أنا الشفاف

وأنا الفاضي

وقالوا إن فيّ آلاف

وأنا الشاهد

وبرضه شهيد

ولكني بسبع ترواح

صمود وعنيد

ومهما يحاولوا يخفوها ويخفوني

فضايحهم تبان واضحة

 بمجرد نظرة لعيونى

وأنا العاشق إيدين طاهرة

إيدين ساجدة، إيدين ما تخاف

ولا ترفع ع الفاضي وع المليان

توافق ع اللي متخبي وعمره ما بان

وآه لو بان

وأنا المعشوق من الكهنة وم الحاشية

وأغلبهم عميل خطاف

ويخدعنا الكتير منهم

بمنظرهم وآه منهم

في وقت الجد تكشفهم ضمايرهم

ولو لسه واحد فيهم في قلبه ذرة من إنصاف

بيتركِّن على الإرفاف

ولو زود

فتدبأله حدوته

وتوته توته

يا سجن يا ابويا وفضيحه

يا إما بالقليل موته

أنا الصندوق

أنا الفاضي

وأنا القاضي في ساعة الجد

باكون السيف لنور العدل

واكون النور لسيف العدل 

باكون الحد 

ولو يملوني يبقى بخير ويبقى بحق

وجوفي لو دخله حرام

باحس بإني هتآيا

وانا المفروض أكون آية

أنا الصندوق

واسألوا عني كل الناس

أقولك لا متسألشي

بل اسألني أنا عنهم

قليل منهم بأدعي لهم

وكنت اتمنى أبوس إيدهم

وهم يحطوا بالورقات

أحس ينوروا الجنابات

ويحيوا القلب فيّ المات

في إيدهم نور

وشوشهم خير

خفاف كالطير

بل اسألني أنا عنهم

كتير منهم بألعنهم

وهم يحطوا بالورقات

أحس بأن قطر وفات

فدغدغني ورماني رفات

إيدين ضلمه

قلوب عاميه

نفوس ضاله

عشان اليوم تبيع بكره

ومن سكره إلى سكره

ما دام الحل في الغله

ودا ماسك لدا ذلة

حشيش في الزرع

بس الزرع كله حشيش

وتعمل إيه متسألنيش

وبَعِّد عني سيبني أعيش

دا انا الصندوق

أنا الصندوق ومش إسود

يقع في البحر ما يقعش

ويرجع أو ما يرجعش

وإيه أسبابه لو تعرف.. ما تعرفش

لأن العالم الحي

بيعمل كل ما يريده.. ولا تريدش

عوالم زحلفه وبرغوت

عشان لا هي قادرة لا تقرص.. ولا تحرّس

فكله يموت

وموت أولادنا في الصندوق

وموت أولادنا م الصندوق

وموت أولادنا ع الصندوق

وموت أولادنا بالصندوق

ما بيهموش

لأن احنا في نظره هموش

ولا بنسوش

وإمتى نساوي أو تصبح لنا هيبة

وألف حساب لنا في حضورنا أو غيبة

دا لازم نبتدي تاني من الصندوق

أنا الصندوق..  أنا الصندوق