بحلم يا مصر
من بعد صمت يطول سنين
من بعد ما طال الآنين
من بعد ما فاض الحنين
يا مصر بالحلم الجميل راجعين
*****
نحلم ببكرة يعيد زمان ولى
فاكرة التاريخ يا مصرنا ولا؟
فاكرة العزيز والخير مع الغلة؟!
قرآنا يحكي وكلنا فاكرين
يا مصر بالحلم الجميل راجعين
*****
أنا المتيم بعشقك والوداد صافي
إرمي بذور الأمل فوق حضنك الدافي
إرمي همومك وانا اشيلها على اكتافي
يرجع أمانك وأمنك يفرح الملايين
يا مصر بالحلم الجميل راجعين
*****
عارفين طريقنا يا أمنا عارفين
فاكرين تاريخنا والله مش ناسين
حالفين يا غالية بربنا حالفين
هنخلي بإيدينا الرمال بساتين
يا مصر بالحلم الجميل راجعين
*****
وشمس بكرة الجاي تغازلنا
وتعود خيوط الأمل وتعود مغازلنا
بعلمنا والعمل هنكيد عوازلنا
والحلم يسبق سنينا وكلنا صاحين
يا مصر بالحلم الجميل راجعين
